டிசம்பர் மாத இறுதிக்குள் கோவையில் கணித பூங்காவை கட்டி முடிக்க மாநகராட்சி திட்டம் !
- by CC Web Desk
- Sep 18,2024
கோவை மாவட்டத்தில் வேறு எங்கும் இல்லாத அளவிற்கு மிகச் சிறப்பாக ஒரு கணித பூங்கா கோவை மாநகராட்சிக்குட்பட்ட வ.உ.சி பூங்கா வளாகத்தில் உருவாகி வருகிறது.
'ராமானுஜன் கணிதப் பூங்கா' எனும் பெயரில் உருவாகி வரும் இந்த பூங்கா 50 சென்ட் நிலத்தில் ரூ.60 லட்சம் மதிப்பில் கட்டப்பட்டு வருகிறது. கணிதம் சார்ந்த பல்வேறு கோட்பாடுகளையும் மாதிரிகளையும் பள்ளி மாணவர்கள் அறிந்து கொள்ள வசதியாக இந்த பூங்கா கோவை மாநகராட்சி தரப்பில் உருவாகி வருகிறது.
இதை டிசம்பர் மாத இறுதிக்குள் முழுமையாக முடிக்க இலக்கு நிர்ணயிக்கப்பட்டு பணிகள் நடைபெற்று வருகிறது. கணிதத்துறை சார்ந்த மாதிரிகள், எண்கள், வடிவங்கள் ஆகியவை இங்கு உருவாகும் குழந்தைகள் விளையாட்டு பகுதியில் நிறுவப்பட உள்ளன.
இந்தப் பூங்காவை மேலிருந்து பார்க்கும் போது அது கணிதத் துறையின் முக்கிய சின்னங்களில் ஒன்றான Pi சின்ன வடிவில் அமைக்கப்பட்டிருப்பதை பார்க்க முடியும்.
